Sands kommuna fekk í gjár fráboðan um at rotta var sædd á havnalagnum á Sandi. 

Øll tilbúgving varð beinanvegin sett í verk, og hetta var gjørt í samráð við Umhvørvisstovuna.

Slíkar fráboðanir verða tiknar í størsta álvara her í kommununi.

Sands kommuna heitir á fólk um at boða frá, gerast tey varug við rottu, ella spor eftir rottu.

Fakta um rottuna í Føroyum:

Eyðfinn Magnussen granskari skrivaði í 2019,

at rottan kom fyrst til Hvalbiar. Tað var í 1768. Árið eftir kom hon til Havnar. Haðani spjaddi hon seg til restina av Streymoynni og kom eisini til Eysturoynna og Vágar. 120 ár seinni kom rottan eisini í Borðoynna. Hetta staðfesta úrslit í nýggjari genkanning, sum nýliga er almannakunngjørd í kenda vísindaliga tíðarritinum Heredity.